昨日我地八人一行到中環位於置地廣場的香港銀行家會所用膳。 因為其中一名食客話呢間餐廳嘅中菜部非常好食，以前佢都做咗好多年會員，但後來轉到去China Club中國會。但仍然掛念銀行會嘅中菜，所以我地今次就遷就下佢！ 相信所有金融介嘅朋友一定唔會陌生！
先來一人一碗例湯匙, 花參懷山雪耳瘦肉湯。 當中加咗一粒藍棗味道帶點藥材味但可以接受 （因為我最怕藥材）而且湯好夠味！料亦好多！我個碗有好多雪耳㗎 >.< 正!!!!
冷盤點咗個X.O.醬海蜇，當大家都好期待呢個冷盤個陣，竟然食唔到有X.O.醬嘅味道! 點搞？
食得中菜，叉燒同燒肉係不可缺少的。 但係冇燒肉唯有點乳豬啦！ （據食客話呢度啲叉燒好出名㗎）errrrrr 不過不失啦，又未去到好好食！ So far, Island Tang係我食過覺得最好食嘅叉燒！ 乳豬又好似好乾咁。 唉！
其實蘿蔔糕都無乜可以點輸㗎啦因為係我最愛。但係真係一啲都唔出色囉 （咳咳!!小朋友係唔識講大話嘅，唔該!）
點心類我諗睇圖片你地都估計到好唔好食啦！ 燒賣好乾！ 素菜餃都好dry！蝦餃一樣係咁dry! Dry過我塊面囉!!!!!! 全部都好DRY DRY DRY!!!! Excuse me!
終於有返樣似樣啲嘅餸，係女侍應極力推介！ 清湯蘿蔔牛腩。 牛腩好有牛味而且好林好好咬口。 蘿蔔亦好甜應該炆咗好耐！連個湯都好甜不過你話係咪超正呢，係比起今日所有食物為上囉!!
春卷同鹹水角就唔駛再問啦！ 好普通！
鹽焗雞一隻，份量太少，但係佢地話細雞啲肉質好啲喎！ （最後一人一件度）不過隻雞係唔錯嘅， 肉質夠嫩滑！不過有少少唔夠喉 >.<
波蘿咕嚕肉係可以試下間餐廳廚師手，呢個咕嚕肉係正常！無話特別好味又冇話難食！
最後一味～～涼瓜火腩魚鰭！！！！ 係其中一名食客好想食嘅菜。涼瓜味唔係特別重所以ok，條魚的確幾滑，唔錯唔錯！ 不過食到一半大家就提起銀行會最出名一定係男人的浪漫～～豆腐班腩飯！！！！其實我都好鍾意（都話我好麻甩㗎啦）於是大家都揼心點解唔叫豆腐班腩煲！！！！失策！！！！
埋單承惠二千大元。其實一啲都唔貴，中環食一個簡簡單單嘅lunch無百幾二百都唔好諗！ 只不過，諗住一嘗以前嘅味道都帶點失望而回！！！！
