東岸活蝦料理

由於呢間餐廳真係超級好食所以急不及待介紹比大家！ 不過呢間餐廳位於高雄同墾丁中間！叫做屏東縣東港! 每年我同張生都會去墾丁潛水所以喺當地認識了一些朋友。 呢間餐廳就係佢地介紹㗎啦！

地方係好乾淨嘅因為我地3點去到個陣全跟餐廳大約有6，7個伙計晌到清潔洗地。 可能好多客人都係將蝦殼掉晌地下所以日日都要洗地！枱枱椅子唔好太大期望，最緊要係食物質素！ 全場都係開放式所以亦唔會有冷氣！ 我地7月去都唔算非常熱，佢地亦好細心將把風扇靠近我地！
好啦！ 入正題！以下就係我地兩條友仔點嘅餸:

 碳燒豬頸肉 - 呢個叫唔叫都罷因為無咩特別。

 

 

蒜香蝦 - 個湯好有蝦嘅鮮味！再加埋蔥真係不得了。湯汁又入哂落蝦到，連蝦頭都好好味。

 

胡椒蝦係乾炒，蝦殼充滿胡椒味但係又唔會乾到另肉質變差。

 

 

 蒜泥蝦 - 超掂！ 蒜好香個汁超惹味！蝦嘅肉質好爽口，正！

每碟都係台幣390即係等於港幣100蚊都唔駛呀！最好多人一齊食可以叫多幾款嚟試。 唔好好似我地咁食唔哂要打包返酒店食。

兩個人食三碟蝦真係食唔哂，因為平均每一碟都有起碼8-10隻蝦，隻隻大細一樣。肉質真係唔錯！但係我唔明點解佢地要用個好似痰罐咁嘅器皿來煮。

 



下面個三
張圖係佢地網站download嘅因為我唔記得影相！哈哈

 



 地方都算好大，夜晚應該好多客人來幫襯。 大家切記三點半前到係無人會開門比你！

要去呢間餐廳最好有GPS因為都唔算容易搵。

最後送上餐廳地址，電話和菜單比你好好研究！ Enjoy~~

網址：http://088352793.tw.tranews.com/

營業電話：08-8336677、08-8352793、0912-781311
營業地址：屏東縣東港鎮興和路249號

好酒推介 - 南部美人

 

我係一個sake殺手，識得我嘅人都知道我係超級鍾意飲sake！一來覺得易入口，二來飲多咗第二朝起身一點兒辛苦都唔會有（如果你飲靚sake嘅話）三來就係我張生都好鍾意飲！不過佢比我要求更高，一定要夠凍同埋要有隻靚杯佢先飲得開心！

呢隻清酒都係佢介紹我飲，原因？佢夠平夠好飲！攞嚟招呼家人朋友一啲都唔失禮！個個必定有讚無彈！我試過買去公司小型晚餐，當晚我地係吃打邊爐！我一早將sake放晌雪櫃放工先拎去。同事當中有外國人，有唔同地方長大嘅香港人亦有內地人。 全部有份飲嘅同事都讚不絕口第日仲問我邊度買因為佢地想買返屋企開party用！ 就算我地拎去家庭聚會個個都話正！

照片係網上搵因為我只係影咗個箱同埋6支大吟嚷

 

先講講個size先啦。 佢有720ml同1.8L，好多人都會覺得1.8L點飲呀！ 講真，兩三條友吹下水好快飲哂。 唔係講笑，我兩個人食晚飯都可以清支1.8L啦！ 因為佢太易入口，飲下飲下真係唔覺 ! 就連我最唔鍾意飲酒嘅朋友都可以接受佢，可想言之佢個威力有幾大!

銷售地點亦唔係太多，大型例如Citysuper，The one 地牢個間超級市場。

 

一般日本餐廳係無得點嘅，最大路都係飲啲平價例如玉乃光，男山等等。 所以我通常會買去餐廳情願比開瓶費都想飲得好啲！ 再來就係講下價錢， 一支1.8L夠竟要幾多錢呢？ 答案係＄340港幣！！！！係你無睇錯我亦無講錯！如果你有Citysuper咭仲有95折即係＄323！！！！1.8L喎！ 係咪超抵先？ 不過，由於識飲嘅人越來越多所以好多時都會無貨！ 我同Citysuper嘅姐姐比較熟因為我每次都6支6支咁入貨(6支放係我屋企唔駛一個月就無哂！ 無他嘅，我地兩個都勁好客。 每星期都一定有朋友上嚟飲酒。亦因為呢個原因，我屋企係有兩個雪櫃)，每次有貨返佢都即時打比我幫我留貨。

呢個箱啱啱好藏到6支，運送哥哥一箱過唔駛煩

 

720ml其實都賣緊二百幾蚊，加多一百都唔駛就多一倍酒喎！點計都係1.8L抵啦！況且飲唔哂可以放返落雪櫃，只要一星期飲哂就ok。 當然，超過一星期都得只不過味道會走咗啲無咁甜！ 話你知如果鍾意吃海膽和蟹子沙律嘅話配呢支酒係一流！ 食物即時變得更甜，鮮味更出！連青瓜絲都變得好甜呢!!!!

以上個支我講緊係南部美人吟嚷，而張相係大吟嚷(我地連大吟嚷都係6支咁買, 哈哈哈哈)。 當然大吟嚷係好飲好多啦。 價錢大約六百至七百蚊左右，但個size係720ml。 係㗎，鍾意飲酒呢個嗜好可以好貴㗎！ 咁一定比唔上過萬嘅紅酒啦！我試過六個都鍾意喝酒嘅人食日本餐，淨係飲酒一人都五，六百。 當中仲要有飲啲平價酒。

 

所以下次去朋友屋企或者自己屋企開party就可以去買定啦！ 好似買滿300已經包埋送貨，超抵！

日本盛田屋豆乳乳酪面膜

日本盛田屋豆乳乳酪面膜

遲來的春天哦~~   係日本好多明星都讚好嘅面膜。價錢平民化但係質素絕對唔求其。 日本其實係一個好嚴謹嘅地方，咁先會有好嘅產品㗎嘛！ 盛田屋本身係做豆腐嘅，之後用相同嘅方法來研製面膜，結果大家都知道就係超級好賣！
先講講佢裡面有咩成分先啦

豆乳精華，米糠油精華 ﹣ 調理失衡肌膚、集中修護油脂粒
乳酪萃取物 ﹣ 含維他命A，可軟化角質、促進新陳代謝
初乳蛋白 ﹣ 消除活性氧，保濕修護作用
蜂蜜、蜂王乳 ﹣ 抗氧化、細胞活化及保濕作用。防止肌膚乾燥，預防斑點及細紋形成。
大豆異黃酮 ﹣ 促進細胞更新、膠原蛋白生成，增進皮膚彈性與緊實度、淡化細紋與，淨白、保濕。
大豆皂素 ﹣ 爽膚、抑制活性酸素，抗老化
維他命Ｅ ﹣ 具有極佳抗氧化作用
大豆卵磷脂 ﹣ 讓肌膚回復彈力，高效保濕、有效協助美容精華深層滲透，回復肌膚的年輕、柔軟。

以上嘅成分係網上揾到嘅因為個罐本身係寫日文而我又唔識睇！
咁啱有朋友去日本旅遊當然問問可否幫忙買回來（其實香港都有不過我覺得係日本買新鮮啲同埋平少少。都話做咗師奶仔個人都要精明啲㗎啦）一買就買咗3罐>.<
即晚返到屋企同老公一齊用，佢明顯地白咗一度（佢一向都係白皮豬但係仍然好貪白，不過我就係鍾意白嘅男孩子）而我只係白咗少少。 皮膚係滑咗嘅但係唔係講到毛孔即時細咗呢？未覺得，可能要用多幾次先知！
以價錢得到結果都算好好㗎啦。 外面所有美白面膜都貴到飛起！

一罐細細好似唔係用到好耐，但佢網上傳聞可以用到15次左右（厚敷喎）計返的話都唔駛10蚊一次，抵都難啦！

努力敷！繼續敷！

緊急救膚好物品

近期天氣乾燥加上我係有嚴重鼻敏感嘅人，咀唇上和鼻子一定乾到脫皮。 係呢個時候，我通常會諗下過往用過最有效嘅保濕產品。 人真係要去到最危急嘅情況先會諗起最實用嘅方法。 以下就係我本人覺得最好最危急嘅保濕產品：

 

Fresh Rose Face Mask一定有份入圍啦，但我嫌佢有少少美中不足就係敷完之後要用清水洗乾淨唔可以就咁用化妝綿抹走因為佢裡面有好多玫瑰花瓣。

 但係如果你朝早醒來好趕時間但塊面又乾到上唔到粉。Fresh真係幫到手！起床後用清水洗洗面再敷住玫瑰面膜沖涼，最後先把面膜洗走。只需要短短的十五分鐘上粉就很貼服。 當然，如果大家有時間我會建議搽好精華之後敷一塊面膜唔好洗待吸收後再搽面霜,咁就更保濕啦。

精華素同面霜我覺得Aesop好用，因為佢以價錢同效果我覺得有四粒星。 Aesop支Damascan Rose Facial Treatment大約五百多，但係細細支可以用到一年。 支油本身唔可以就咁用，要加落精華素一齊用。

 

當然支精華素我都係用Aesop，佢呢支Parley Seed Anti Oxidant精華唔駛五百蚊大大支，用嘅分量又唔需要太多因為會溝油。每一次我只不過用五毫子咁大分量嘅serum再加三滴玫瑰油用掌心輕力按入面，之後再用serum溝Parsley Seed Anti-Oxidant Facial Treatment（佢有抗衰老嘅功效)就已經夠滋潤啦。特點係唔會話好油難吸收，相反仲吸得好快好爽！ 其實我係Aesop一來香港嘅時候就已經開始用。但之後貪新鮮試其他牌子就慢慢忘記咗Aesop嘅好。 好坦白，我呢幾年冬天都無咩脫皮情況所以無需要用到咁勁嘅護膚品。

可能隨著年紀漸大又比較忙所以上年特別乾！就算有老公滋潤都係咁話！

面霜我用係Aesop Perfect Facial Hydrating Cream，由於佢真係太強所以夏天唔可以用，不過開冷氣嘅時候都可以當晚霜。 佢搽上面時真係吸得好快同一點兒笠嘅感覺都無，超讚！價錢就貴咗少少要成八百幾蚊，但係比起千幾蚊個啲已經算好好啦！而家樣樣野都加價就係人工無咩點加。激死人！

                                        另外介紹一些平價嘅面膜。台灣Bonanza 寶藝沙龍對好多人黎講應該唔陌生啦。 以前得藍色同紫色，藍色係酵素冷膜有美白功效。紫色係保濕面膜，好明顯係保濕啦！呢兩款面膜都係啫哩狀。呢個牌子講緊係幾年前我朋友仲未結婚已經開始用，佢而家仔女都生埋啦！都係個句，唔到緊張關頭都唔記得佢嘅好！

近年仲新出咗多穀物同深層面膜。多穀物主力係美白，試過真係好美白而且滋潤度高唔似一般嘅美白面膜,應該話去面黃好好。 呢隻面膜本身唔會乾到邊硬，我嘅用法就係厚敷完用棒棒摑走佢。話明多穀物一定好多粒子啦，我會再用化妝綿抹多一次。之後就可以搽平時嘅護膚品㗎啦！
有時我貪心啲會搽完精華素再敷多塊平價面膜例如森田藥莊，肌研呀等等。

最後係送上我老公昨晚為我下廚的晚餐。 日式照燒汁燒牛排加配菜 。十分美味！！應該好多女士會欣賞因為個Teriyaki Sauce較甜，但我本身唔係好喜歡甜。 不過食落係ok (點都要讚揚下嘅>.<)  食譜煮法之後再告訴大家！Enjoy~

2015重新出發 ^o^

因為之前的電郵帳戶有問題所以舊的網誌唔可以再用了。 不過無所謂， 舊嘅唔去，新嘅唔來！回想都已經3～4年無寫過文，唔知仲有無寫作嘅技巧。 之前個3～4年實在忙得緊要所以就算用過食過咩好野根本無時間去寫。（但係我都有影相㗎） 而家換了工作好好多， 而且所有私事都已經完滿地完成！ 雖然仲有少少遺憾（遲啲再交代）這4年間唯一改變就是我已經成為了張太太了～～～先講少少我的真命天子， 他是我中學時代的白馬王子。即係第一眼見到就被吸引住個隻～估唔到相隔多年後會重遇還結婚了哈哈!!! （其實都差不多一年啦 >.< 嘩哈哈）可能開心嘅時間實在過得太快！ 將來我亦會繼續介紹好多好野比大家！還會將我之前所去的旅行跟大家分享~~
以下係我過往的網誌，雖然而家睇返覺得以前有點白痴而且好多錯字（其實我在香港只讀到小六啦）但係都係我人生一部分經歷呀～
http://www.carmenc4ever.blogspot.com/